ASEGARCEK LOIUKO PILOTALEKUA INAUGURATUKO DU

2019/03/22

Larunbat honetan Asegarcek antolatuta eta Telecincok zuzenean eskainiko duen pilota jaialdia Bizkaiko Loiu herriko pilotaleku berri eta politaren inauguraldiaren protagonista izango da.
Eraikuntza eder hau Bizkaian azkenaldian egiten ari diren pilotaleku berrien zerrendan sartuko da, herriarentzat 400 ikusleentzako edukierarekin eta profesional mailako pilotarien jaialdiak gauzatzeko hornidura duen frontoi bat suposatzen delarik.
Pilotaleku eta inguruetako urbanizazio lanak egiteak 1.400.000 eurotako kostea eragin du baina irudietan ikusten denez inbertsio ona izan dela argi geratzen da.

Goi mailako jaialdia

Eta egunaren garrantziaren parean egoteko asmoz Loiuko Udalak eta Asegarcek oso jaialdi ederra antolatu dute. Bigarren mailako eskuz banakako txapelketari dagokion Arbizu vs. Medina partidak emanaldia zabalduko du eta ondoren ez nolanahiko neurketa: Olaizola II.a eta Otxandorena 2005ko binakako txapeldunordeen aurrean,hots, Bengoetxea VI.a eta Beloki.
Jaialdia Esain-Albizuri eta Leiza-Rairen arteko norgehiagokaz bukatuko da.