ASEGARCEK, ASPEK, ESKUZKO PILOTA ENPRESEN LIGAK ETA ETBK, PILOTA ERRETRANSMITITZEKO AKORDIOA BERRITU DUTE

2019-03-22

Euskal Telebistak pilota emanaldiak egiteko akordioa berritu du Asegarce, Aspe eta Eskuzko Pilota Enpresen Ligarekin. Hitzarmena hiru urterako da eta urte bat gehiagora luzatzeko aukera dago. ETBren Iurretako egoitzan egin den ekitaldian Andoni Ortuzar EiTBko zuzendaria nagusia, Pedro Garcia Asegarceko ordezkaria, Aspeko Fernando Vidarte eta Eskuzko Pilota Enpresen Ligako (LEP.M) Santiago Vazquez egon dira.
ETBk pilota enpresekin zuen hitzarmena otsailaren 20ean amaitzen zen eta orain hitzartutakoarekin datozen hiru urteetan pilota emanaldiak egiten jarraituko du. Urtero 109 jaialdi eskainiko ditu ETBk, baita Asegarce eta Aspe enpresek antolatu ditzaketen beste jaialdi berezi batzuk. Gaur sinatutako akordioaren arabera, torneo eta txapelketetako final guztiak Euskal Telebistan izango dira ikusgai.
Honenbestez, Euskal Telebistak eta pilotak elkarrekin jarraituko dute. Orain arte bezala, emanaldiak ostiral gauetan eta igande arratsaldetan egingo dira, uda parteko jaialdietan salbu; horiek aste barruan ere eman daitezke, beharren arabera.
Akordioa sinatu dutenak gustura agertu dira lortutako hitzarmenarekin.