2021/09/28
• Txapelketa asteburu honetan hasi eta azaroaren 14an amaituko da Bizkaia Frontoiko finalarekin
• Altuna III, Jaka, Ezkurdia eta Bengoetxea VI izango dira taldeburuak
• Lehiaketa final-zortzirenetan hasiko da, final-laurdenetako ligaxka bat izango du, eta ondoren finalerdiak, kontsolazio finala eta finala jokatuko dituzte
Gaurko aurkezpenean eman dute ezagutzera 4 ½ ko Eusko Label Txapelketa irabazten saiatuko diren 12 pilotarien zerrenda. Baiko Pilotako sei ordezkari eta Aspeko beste sei ahaleginduko dira azaroaren 14ko finalean txapela janzten.
Asteburu honetan bertan jokatuko dira final-zortzirenetako partidak. Ostiralean Artolak eta Elordik estreinatuko dute lehiaketa Mallabian. Larunbatean, Donostian, Laso-Peña II, eta igandean, Lekeition, Urrutikoetxea-Victor, final-laurdenetako ligaxkara pasatzeko asmoarekin kantxaratuko dira. Eta astelehenean, Tolosako Beotibarren, amaiera emango zaio final-zortzirenetako faseari Elezkano II-P.Etxeberria partidarekin.
Asteburuko lau irabazleek Altuna III.a, Jaka, Ezkurdia eta Bengoetxea VI.a izango dituzte zain final-laurdenetako ligaxkan.
Jaialdi hauetarako sarrerak gaur arratsaldean hasita eskuratu ahal izango dira entradasfronton webgunean.
Urriaren 1ean, ostiralean, hasiko da 4 ½ ko Eusko Label 2021 Txapelketa.