Zalantzan dago CaixaBank Masterseko azken fasea non jokatuko den

2020/09/03

Errioxako Gobernuak hartutako neurri berriek zalantzan jarri dute CaixaBank Masterseko azken fasea Logroñoko Adarraga pilotalekuan jokatu ahal izatea.
CaixaBank Mastersa sailkapen ligaxkako azken jardunaldietan murgilduta dago eta jokoan ari diren zortzi bikoteetatik seik, aukerak dituzte, hasiera batean Logroñon jokatzekoa zen azken faserako sailkatzeko.

Errioxako Gobernuak agindutako aurreko dekretuak gehienez 1000 pertsonako eta %75eko gehieneko edukiera ahalbidetzen zuen frontoietan. Horrez gain, maskararen erabilera derigorrezkoa zen eta segurtasun-neurri guztiak betetzen zirela bermatu beharra zegoen.

Dekretu berriak, ordea, maskara erabiltzeaz gain, publikoaren arteko distantzia 1,5 metrokoa izatea eskatzen du, eta ez du %50eko edukiera gainditzen uzten. Horrek dakartzan mugak kontuan hartuta, Errioxako Gobernuak hartutako neurri berri horiek arriskuan jartzen dute CaixaBank Mastersaren azken fasea Logroñon jokatu ahal izatea.