Luciano Juaristi, Atano X.a, izan da gaur eguerdian Esku Pilota Enpresen Ligak aurkeztutako Pilotaren Izartegian sartu den lehen pilotaria.
Buruz Buruko txapeldunak eta esku-pilotako hainbat profesional izan dira gaur eguerdian Sondikako Maipú jatetxean egin den Pilotaren Izartegiaren aurkezpenean.
2025. urte honetan, Buruz Buruko lehen finalaren 85. urteurrena da, eta gertaera historiko honekin bat eginez, EPELek, Esku Pilota Enpresen Ligak, Pilotaren Izartegia aurkeztu du.
Pilotaren Izartegiak, hasiera batean espazio birtual bat izango bada ere, etorkizunean kokapen fisiko bat izango du, eta kirol honetan arrastoa utzi duten pilotariek izango dute lekua bertan.
Luciano Juaristi, Atano X.a, izan da Pilotaren Izartegian sartu den lehen omendua. Pilotari profesionalen saga historiko bateko kidea, Atano X.ak, Atano III.a ospetsuaren loba, 24 urterekin debutatu zuen pilotari profesional gisa. 1965 eta 1969 urteen artean Atano X.ak elkarren segidako bost Buruz Buruko final jokatu zituen. Horietatik bigarrena irabazi zuen, Eibarko Astelenan, eta laugarrena, Donostiako Anoeta pilotalekuan. Buruz Buruko bi txapel lortuta, 1974an erretiratu zen Atano X.a.
Luciano Juaristik, Atano X.ak, EPELen urrezko intsignia jaso du eta honekin batera, Pilotaren Izartegian sartu da.