Larunbat honetan hasiko da Buruz Buruko 2022 Promozio Txapelketa

2022-03-29

• Txapelketa asteburu honetan hasi eta maiatzaren 21ean amaituko da Labriteko finalarekin

• Larrazabal, Alberdi II, Zubizarreta III, Bakaikoa edo Alberdi (aurrekanporaketa), Zabala, Salaberria, Elordi eta Egiguren V.a txapela irabazten saiatuko dira

• Lehiaketa final-laurdenetako liga batekin hasiko dute, eta ondoren, finalerdiak eta finala jokatuko dituzte

Portugalete, 2022ko martxoaren 29a


Buruz Buruko Promozio Txapelketa irabazten saiatuko diren pilotarien zerrenda eman dute ezagutzera gaur goizean egindako aurkezpenean. Baiko Pilotako lau ordezkari eta Aspeko beste lau ahaleginduko dira maiatzaren 21eko finalean txapela janzten.

 Portugaleteko Puente Colgante Boutique hotelean egin da aurkezpena, eta pilotariek Bizkaia Zubiaren goiko pasarelan egin dute Txapelketaren aurkezpen argazkia.


Asteburu honetan bertan jokatuko dituzte final-laurdenetako ligako aurreneko partidak. Larunbatean Larrazabalek eta Egiguren V.ak estreinatuko dute lehiaketa Amurrion eta egun berean, Albelda de Ireguan jokatuko dute Zabalak eta Alberdi II.ak.
Beste lau ordezkariek hurrengo asteburuan ekingo diote lehiaketari.


Aurreneko jardunaldiko jaialdietarako sarrerak entradasfronton webgunean eskuratu daitezke jadanik.