EPELek eta Gasteizko Udalak gizonezkoen esku pilota profesionaleko 7 jaialdi antolatzeko lankidetza-protokolo orokorra sinatu dute

2022/06/30

Hiru Andre Maria Zuriaren Torneoan eta gainerakoak 1. mailako txapelketaren batean, guztiak Ogeta pilotalekuan

Esku Pilota Enpresen Ligak (LEPM-EPEL) eta Gasteizko Udalak lankidetza-protokolo orokorra sinatu dute Ogeta pilotalekuan gutxienez zazpi jaialdi antolatzeko urtebetez. Horietako hiru Andre Maria Zuriaren Torneoan, eta gainerakoak 1. mailako txapelketaren batean, finalerdi bat barne.

Lankidetza-protokolo orokor honen aurkezpenean Borja Osések, LEPM-EPELeko kontseilari ahaldunak, adierazi du “Gasteiz bezalako hiri bat, iraganean pilota-ekitaldi handiak hartu dituena, pilota-enpresek antolatzen duten maila goreneko lehiaketen zirkuituan egon behar dela“.

Bestalde, Gorka Urtaran Gasteizko alkateak nabarmendu du “hiru helburu dituela. Lehenengoa, gure hirian kirol-ekitaldiak sustatzea, are gehiago Gasteizko kulturaren eta kirolaren parte den euskal pilota denean. Bigarrena, berriz ere Ogeta pilotalekua pilotaren planoan jartzea da, kirol modalitate honen erreferente izan baita. Azkenik, lehen mailako pilotariak gure hirira ekartzea Andre Maria Zuriaren jaietan”.

Andre Maria Zuriaren Torneoko jaialdietarako sarrerak gaurtik aurrera erosi ahal izango dira entradasfronton web orrian.