Imazek eskuko mina gainditu du, eta ostiralean Amorebieta-Etxanon izango da

2023/02/28

Lesioaren ondorioz Binakako Txapelketako sailkapen ligako azken hiru jardunaldiak jokatu ezinda egon ondoren, Ander Imazek eskuin eskuan zuen mina gainditu du, eta ostiralean Amorebieta-Etxanoko Amorebieta IV pilotalekuan izango da Lasorekin batera, P.Etxeberria-Rezusta bikotearen aurka jokatzeko gaueko 22:15ean hasiko den playoffeko partidan.

Oiartzungo atzelariak gaur eguerdian Zumaian egin duen azken proban normaltasunez entrenatu du eta ostiralean jokatzeko erabakia hartu du.

Zubizarreta III.a ere jokatzeko prest

Aurrelari ataundarrak eskuin eskuko 3. atzamarreko falange distala hautsi zuen urtarrilaren 28an Bilboko Bizkaia Frontoia pilotalekuan jokatu zuen Binakako Promozio Txapelketako partidan. Lesioa gaindituta, Zubizarreta III.ak Uriondorekin batera jokatuko du ostiral honetan Amorebieta-Etxanon Alberdi-Salaverri II.aren aurka, jaialdia itxiko duen partidan.