BORROKA BIZIA 100 MINUTUTAN

2019/03/22

Olaizola II.a eta Errastik tantu bakarreko aldeaz garaipena lortu dute Bengoetxea VI.a eta Belokiren kontra lepo zegoen Urretxuko Ederrena pilotalekuan.

Lehia borrokatua eta eztabaidaz beterikoa izan da. Bengoetxea VI.a eta Beloki 21-20 irabazten zirela Olaizola II.ak bigarren botean eroan omen du pilota bat eta geroxeago berdinketa lortu du. Leheneago ere jokaldi istilutsu pare bat jasan behar izan duten urdinek haserre bizian azaldu dira eta Beloki aldageletan sartu da su eta gar. Tarte bat igaro ondoren berriro ere itzuli da kantxara baina Olaizolaren sakeari errestoa egin eta gero goizuetarrak gantxu bat sartu du eta 22. tantua lortu dute gorriek.

Partida polita eta disfrutagarria izan da. Laurek oso ondo jokatu dute. Belokik tinko ibili den Errasti menperatu du eta nagusitasuna horri esker Olaizola II.ak hurbiletik sartu behar izan du pilota mordoska galdu duelarik. Bengoetxea VI.a bikain ibli da defentsan eta orokorrean partidu ona egin du leitzarrak.
Pilotalekua gainezka egon da.