Aimar Olaizola II.a daukan 2007ko Baskepensiones BBK Masterraren titulua defendatzera aterako da aurten Bengoetxea VI.a -Eskuz Banakako Txapelduna-, anaia Asier, Barriola, Mtz. de Irujo eta Gonzalezen aurrean.
Txapelketa larunbat honetan hasiko da Iruñean Bengoetxea VI.a eta Gonzalezen arteko partiduaz, Telecincok zuzenean eskainiko duena hain zuzen ere. Neurketa honen irabazleak Mtz. de Irujorekin jokatuko du finalerdian.
Igandean Eibarren Olaizola I.a eta Barriola aurrez aurre izango dira finalaurdenetako bigarren kanporaketan. Lehia hau Euskal Telebistak erretransmitituko du. Irabazleak Olaizola II.arekin neurtuko ditu indarrak.
Finala 27an izango da zehazteke den pilotalekuan Telecincok zuzenean eskainita.
Eskupilota Ligaren bozeramaileek prentsaurrekoan berrikuntza bat sortuko dela esan dute. Berau hauxe da: sake egiterakoan pasa egiten bada ez da bigarren aukerarik izango falta izango baita.
BBK-k txapeldunari 18.000 euroko libreta emango dio eta txapeldunordeari 12.000koa.
Erradiografia Olaizola II.ari
Arratsalde honetan Tolosako La Asuncion klinikan erradiografia bat egin diote Olaizola II.ari Lau eta Erdiko finalean ezker eskuko bostgarren hatzamarrean jaso zuen kolpearen ondorioak aztertzeko. Lehen haustura zeukala esan arren, Asegarceko pilotariak luxazio bat baino ez dauka eta datozen egunetan babesarekin jarraituko beharko duela.
Bestalde, Aratz Mendizabalek eta Mikel Olaetxeak bat egin dute eguerdian Tolosako Beotibar pilotalekuan larunbatean jokatuko duten BBK Promozio Lau eta Erdiko finaleko pilotak hautatzen. Biak konforme geratu dira eta bi loteak alderatuz, Olaetxearena biziagoa omen da.
Mendizabal:: 105,3 y 104,5 gramos.
Olaetxea: 105,8 – 105,9 gramos.