Iker Arretxek EPELn Eskuz Banakako Txapelketako hamaseirenetan sartu da gaur Iruñeko Labrit pilotalekuan Begino erraztasun osoz (8-22) irabazita.
Nahiz eta pilota astintzeko indar handiaren jabe izan, Auzako pilotariak huts dezente egin ditu, batez ere, ezkerreko hormako goiko marratik gora pilotakada franko bidaliz.
Gainera, Arretxe II.ak atzealdean erakutsi duen defentsa itzelak, eragin handia izan du Auzako pilotariaren jokoan, izan ere, aurrean tantoak bukatzerako orduan, falta izan dira batzuk.
Luzaideko pilotariak defentsa zein erasoan, primeran jokatu du eta ohiko jokaldiak egin ditu, halaber, boleak, gantxoak eta abar. Sakeekin ere min handia egin dio aurkariari, lortutako bostetaz aparte, batzuk oso baztertuak izan dira eta.
Datuak:
179 pilotakadak.
38 min.
Begino: sakerik ez
Arretxe II: 5 sake
0-4 1-9 2-10 6-11 7-18 8-22
Rico IV.aren erakustaldia
Promozioko Banakakoan, 10-22 irabazi dio Jorge Ricok Apraizi, piloteoan zein airezko jokoa ondo menperatzen duela garbi utziz. Ceniceroko pilotariak sotamanoz, boleak, gantxo eta hormabikoen bidez menperatu du Gernikako atzelaria.