Zortzigarren jardunaldiari amaiera eman diote Zarauzko eta Mallabiako partidek

2020/08/15

Artolak eta Rezustak CaixaBank Masterseko lidergoari eutsi diote Zarautzen, Urrutikoetxeari eta Irribarriari 4-22 irabazita. Lehenengo itzulia itxi zuten bezala ekin diote bigarrenari gipuzkoarrek. Lehenengo atsedenaldira 3-12ko markagailuarekin iritsi dira eta bigarrenera 4-18koarekin. 359 pilotakada jo dituzte lau pilotariek 43 minutu iraun duen partidan. Lehenengo norgehiagokan, Egiguren V-Ladis Galarzak 17-22 garaitu dituzte Peña II eta Larunbe.

Mallabian 12-22 irabazi dute Jakak eta Albisuk Elezkano II-Mariezkurrena II.aren aurka. Partida parekatuta hasi badute ere (1-1, 2-2, 3-3, 4,4, 7-8), 8. tantotik 18.era jarraian joan dira urdinak eta partida erabakita utzi dute. Garaipen honekin Jaka-Albisuk CaixaBank Masterseko laugarren puntua eskuratu dute. 366 pilotakada jo dituzte pilotariek eta 54 minutu iraun ditu partidak. Jaialdiko lehenengo partidan Arteaga II-Ibai Zabalak 20-22 irabazi dute Elordi-Tolosaren aurka.