YUCATANETIK LABRITERA

2019-03-22

Mexikoko Yucatan penintsulan Alazne neskalagunarekin oporraldi eder bat igaro ondoren, Oinatz Bengoetxeak berriro ere esparatrapu eta larruarekin bat egingo du datorren larunbatean Labrit pilotalekuan.
Mujeres uhartearen edertasuna, Xcaret parke nazionalaren berdea eta Uxmal eta Chichen Itza hiri mayarren historia liluragarria mintzagai izango dira zalantzarik gabe Iruñeko pilotalekuko aldagelan Olaizola I.a eta Otxandorena eta Bengoetxea VI.a eta Patxi Ruizen arteko partiduaren atarian.

Leitzarrak han igarotako bederatzi egun primeran eman dituela esan du baita egunero zazpi jatetxetan bazkaltzeko aukera zituen hotel ikaragarria ondo disfrutatu dutela ere.
“Hango itxasoaren kolore urdinaren parekorik ez dut sekulan ikusi ezta hondarraren zuritasuna ere. Erabat ezberdina da giroa. Dena argiaz beterik dago eta eguraldia izugarri ona izan da”.
Oinatzek datorren larunbateko partiduan ondo aritzea espero du nahiz eta etenaldia apur bat nabaritu “zeharo lasaitasunez beteriko bederatzi egun izan dira, hain ezberdina den inguruan eta horrek eragina izaten du gorputzean”.
Bengoetxea VI.ak lau t ´erdiko txapelketan erakutsi zuen joku maila mantentzearen itxaropena azaltzen du, Mtez. de Irujo larrialdian jarri zuena hain zuzen ere.