TXAPELKETA IREKIA DAGO

2019/03/22

Olaizola II.a-Mendizabal II.ak eta Xala-Zubietak Binakako Txapelketako ligako seigarren ihardunaldia itxi duen partidua jokatu dute gaur Tolosako Beotibarren eta jokoan zegoen laugarren puntua Aspeko bikotearentzat izan da aurkariak 18-22 irabazita.

Partidu ona izan da; nahiz eta atzean denbora gehienean Zubietak agindu, -materiala horretarako izan du- Mendizabal II.ak ondo defenditu du bere tokia eta askotan kendu dio airea Xalari. Hala eta guztiz ere, Lekuindarrak tanto mordo bat sartu du patrikan, Zubietaren jo handiak -batzuk apartak izan dira- aukera asko eman dizkio eta.

Olaizola II.ak ere bere markako gantxoak eta paradak egin ditu baina azken txanpan baten bat kanpora joan zaio. Azken tantoa Zubietak lortu du 10. koadroraino bidalitako pilotakada itzelari esker.