Senarrek debuta egingo du Baiko Pilotarekin

2023-11-15

Ataungo 22 urteko aurrelariak Baiko Pilotaren koadroa osotuko du, eta azaroaren 26an egingo du debuta Seguran.

Aimar Olaizola Baikoko kirol arduradunaren hitzetan “eskuin indartsua du, eta horri esker, tarte handia irekitzen du. Ezkerrarekin berriz, oso ondo maneiatzen du gantxoa. Buruz burukoan gustora ibiltzen den pilotaria da, eta afizionatu mailan lortu dituen emaitzak ikustea besterik ez dago”.

Bukatu gabe dagoen urte honetan, Senarrek Espainiako Txapelketa, Errege Kopa eta Joxan Tolosa torneoa irabazi ditu eskuz banaka. Gipuzkoako Ohorezko Mailako Binakako txapelduna ere bada aurrelari ataundarra pasa den asteburuan finala irabazi eta gero.

Senar Ataungo herriko pilota eskolan hasi zen jokatzen eta ondoren Lapke-ko (Lazkaoko Antzar Pilota Kirol Elkartea) harrobian hazi zen. Beñat Senarrek, bi urterako sinatu du Baiko Pilotarekin eta azaroaren 26an egingo du debuta Seguran.

Senar eskertuta azaldu da Baikok debuta egiteko emandako aukeragatik.