PATXI RUIZEK FINALAURDENETAKO LIGAXKA JOKATUKO DU BEGINO MENDERATUTA IRUÑAN

2019-03-22

Patxi Ruizek EPELen Eskuz Banakako Txapelketako finalaurdenetako ligaxka jokatuko du Iruñako Labrit pilotalekuan Begino 22-12 menderatu ostean.
Banaka duen esperientzia garbi erakutsi du Patxik eta nahiz eta Beginok izugarrizko pilotakadak eman Lizarrako atzelariak airezko defentsa bikainaz eutsio dio. Gainera aukera izan duenean dejadak bota ditu eta jo ere jo egin du.
Beginok duen ahalmenak ez du espero zen etekinik eman, izan ere, pilotakada asko goiko lerroetatik gora joan dira. Gainera dejada egiterako orduan ez du bat ere asmatu.

Leiza eta Mendizabal II.aren arteko partiduan bi zati ezberdin izan dira. Lehen tartean Mendizabal II.ak Leiza menpean eduki du piloteoan eta Lemoako pilotaria denbora osoan airezko defentsan aritu behar izan da.
Bigarren txanpan aldiz,Iñigok aurrekaldean jokatzen hasi da eta dejadak eta zabalerako pilotakaden bidez buelta eman dio partiduari.