Labrit pilotalekua datorren igandean Patxi Ruizek eta Bengoetxea VI.ak elkarren aurka jokatuko duten Eskuz Banakako finalaurdenetako partidurako pilota aukeraketa eskenatokia izan da eguerdiz.
Bereizketa bukatu orduko asegarce.com berariekin harremanetan jarri da eta hau da erran digutena.
-Patxi Ruizek:
“Ezker eskuan izan dudan mina dela eta ez ditut nahi beste entrenamendurik egin baina azken bietan gustura eta txispaz aurkitu dut nire burua.
Errandonea, Beloki eta tankera horretako pilotarien aurka jokatu dut eskuz banaka eta gaurko erarekin alderatuta zeharo ezberdina da. Lau t´erdikoaren antza hartzen ari da airez asko jokatzen delako. Aurrelariek abantaia dute baina ni egokitu naiz dagoeneko”.
-Bengoetxea VI.ak:
“Niretzat Patxi laguna dut, elkarren aurkako partidu bukatu ondoren afaltzera bat eginda joan gaitezke baina datorren igandean Labriteko kantxan egoera erabat aldatuko da, txapelketan aurrera joan nahi dugulako aurkariak izango gara.
Ondo ikusten dut, ederto prestatuta eta kolpez. Espero dut joan den igandean Eibarren Aritz Lasaren aurkako partiduaren joko berdina egitea”.
Patxi Ruiz: 105, 104, 4 g.
Bengoetxea VI.a: 104,9, 104,6 g.
Zallan ere bai
Peñagarikanok eta Ibai Zabalak bat egin dute Zallako Mimetiz pilotalekuan datorren igandean jokatuko duten Eskuz Banakako Promoziozko txapelketako partidurako pilotak aukeratzeko.
Azpeitiako pilotariak 105,5 eta 104,7 gramoko pilotak hartu ditu eta Ibaik berriz 105,1 eta 104,6 koak.