Ostiralean hasiko da Azkoitian 2025eko Buruz Buruko Txapelketa

2025/03/31

Txapelketa asteburu honetan hasi eta ekainaren 1ean amaituko da Bizkaia Frontoiko finalarekin
Laso, Jaka, Ezkurdia, Altuna III, Artola, Larrazabal, Senar, Peña II, Zabala, Elordi, Dario eta P.Etxeberria txapela irabazten saiatuko dira
Lehiaketa final-zortzirenetako kanporaketekin hasiko da, ondoren final-laurdenetako liga jokatuko dute. Finalerdien ondoren, Bizkaia Frontoian erabakiko da finala
CaixaBankek Buruz Buruko Txapelketaren babesle nagusia izaten jarraituko du beste urte batez

Donostia, 2025eko martxoaren 31

Buruz Buruko Txapelketa irabazten saiatuko diren pilotarien zerrenda eman dute ezagutzera gaur goizean egindako aurkezpenean. Baiko Pilotako sei ordezkari eta Aspeko beste sei ahaleginduko dira ekainaren 1eko finalean txapela janzten. Basque Culinary Centerren egin da aurkezpena, eta baita Txapelketaren aurkezpen argazkia ere.

Ostiralean hasiko da Txapelketa Azkoitian

Asteburu honetan bertan jokatuko dituzte final-zortzirenetako kanporaketak. Ostiralean Ezkurdiak eta Larrazabalek estreinatuko dute lehiaketa Azkoitian; larunbatean Elordi-Senarrek Bilbon, eta Dario-Peña II.ak Iruñean jokatuko dute; eta igandean, Tolosan, Jaka eta P.Etxeberria izango dira aurrez aurre. Final-laurdenetan zain izango dituzte iaz finalerdiak jokatu zituzten lau pilotariak: Laso, Altuna III, Artola eta Zabala.

EPELen eta CaixaBanken arteko akordioa

Esku Pilota Enpresen Ligak eta CaixaBankek akordio bat lortu dute euren arteko harremana beste bi urtez luzatzeko, eta, besteak beste, CaixaBank izango da berriz ere Buruz Buruko Txapelketaren babesle nagusia.

Sarrerak eskuragarri

Buruz Buruko Txapelketako jaialdietarako sarrerak entradasfronton atarian eskuratu daitezke jadanik.