Bengoetxea VI.a eta Mtz. de Irujo Donostiako Atano III.a pilotalekuan izan dira gaur eguerdian, igandean aurrez aurre izango diren Eskuz Banakako txapelketako final-laurdenetako ligaxkako azken partidurako pilotak hautatzen.
Bakoitzak bere materiala hartu du baina iritzi ezberdinak izan dira pilotei buruz hitz egiterakoan.
Bengoetxea VI.a honelaxe mintzo da:
“Ez naiz normalean besteen materialari buruz ezer esaten baina Juanek hartutako pilotak bote ikaragarria dute. Nireak aldiz azpitik ondo ibiltzen dira, toke badute, ederrak, alegia.
Partiduari begira oso ongi nago; eskuetatik, fisikoki, ilusio handiz eta gogoz. Guzti hori erakutsi nahi dut igandean.
Juan txapeldun handia da, izaera duena eta jokatzeko dohai asko ditu.
Olaizola I.a eta Barriolaren arteko partidua telebistatik ikusiko dut. Jakina, Barriolak irabaztea komeni zait, Asierrek irabaztekotan nik igandean derrigorrez irabazi beharko dut eta”.
Mtz. de Irujo: 106,1 – 106,4 g.
Bengoetxea VI.a: 104,4 – 106,9 gr.
Berasaluze IX.a eta Lemuno Miarritzen
Asier Berasaluze eta Stéphane Lemuno Miarritzeko Plaza Berri pilotalekuan batu dira arratsaldez larunbatean lehiatuko diren Promozio Txapelketako partidurako pilotak bereizteko.
Aipatu behar da jokoan dagoen puntua erabakigarria da finalerdietan sartzeko bigarren postua hiru pilotarik eskura dute eta.
Berriztarrak 106,5 eta 105,2 gramoko larruzkoak hartu ditu eta Angeluarrak aldiz, 105,5 eta 105,2 gramokoak hautatu ditu. Antza denez Ipartarraren pilotek irteera gehiago dute.