CaixaBank Masterseko zortzigarren jardunaldiari hasiera eman diote gaur arratsaldean Irurtzunen eta Oiartzunen.
Irurtzungo Biaizpe frontoian Olaizola II-Zabaletak aise gainditu dituzte Bengoetxea VI-Martija. Garaipen honekin, bosgarren puntua eskuratu dute Aimarrek eta Zabaletak. Oinatzek eta Martijak ordea, nahiz eta hauek ere bost puntu dituzten sailkapenean, asteburuko partida biak galdu ondoren irakurketa ilunagoa egingo dute.
Launako berdinketara arte, partida nahiko parekatua joan da Irurtzunen. Hortik aurrera ordea goitik behera aldatu da markagailua. Olaizola II-Zabaletak 16-4koa jarri dute kolpean eta partida erabakita utzi dute. Azkenengo emaitza 22-9 izan da Olaizola II-Zabaletaren alde. 350 pilotakada izan dira guztira 41 minutu iraun duen partidan.
Oiartzunen alde txikiagoarekin irabazi dute Altuna III-Imazek Ezkurdia-Arangurenen aurka. Hobeto esanda alde txikienarekin irabazi dute, 21-22.
Partida ikusgarria eskaini dute lau pilotariek Oiartzunen zaleen gozamenerako. 768 pilotakada jo dituzte guztira ordu bat eta ia berrogei minutu iraun duen partidan.
Altunak hamar tanto egin ditu eta sei galdu, eta Ezkurdiak zazpi egin ditu eta lau galdu. Atzean, Imazek hiru egin eta hiru galdu, eta Arangurenek, bost egin ditu eta bost galdu.
Partidaren azkenengo emaitzak bestelakorik adierazten badu ere, Ezkurdia eta Aranguren 6-0 aurreratu dira markagailuan. Urdinek gogotik egin behar izan dute lan parean jartzeko (10-10). Hortik aurrera tarteak txikiagoak izan dira, gehienez lau tantokoak, eta amaieran berdinketak izan dira nagusi (17-17, 18-18, 21-21). Azkenean Altuna III-Imazentzat garaipena eta puntua.