Aimar Olaizola eta Imanol Agirrek pilotak bereiztu dituzte Balmasedako frontoian eta konforme geratu dira otarrean aurkitu dutenarekin.
Olaizolaren lotean indartsua eta ibiltzen den pilota bat dago eta bestea azkarragoa ei da. Agirrerenak jokatzekoak dira, normalak.
Biekin egon gara mintzalditxoan eta hauxe da esan digutena.
OLAIZOLA II
-Materiala?
Nereak fuertetsuagoak dira. Baina esan behar dut laurak politak direla.
-Zer nolako partidua espero duzu?
Gogorra. Imanol langilea da , ankak onak ditu eta distantzian ederki moldatzen da. Bera gainditzeko lan asko egin behar da.
-2004an Balmasedan Agirreren kontra jokatu zenuen eta 22-7 menderatu zenuen. Honek zeozer esaten dizu?
Ez. Ez da kontutan beharko datua. Partiduak ezberdinak dira, urteak ezberdinak dira. Jokatu beharreko partiduak dira.
-Aurtengo txapela lortzekotan Retegi II.aren parean jarriko zinateke lau txapelekin …
Uste nuen hiru zeuzkala ,baina beno, hori ez dauka hainbeste garrantzirik. Agian historiarako bai izanen du garrantzia. Hala eta guztiz ere, pilotariarentzat norberarentzat polita da.
-Zer sentitu zenuen jaialdia ostiralera aurreratzen zela esan zizutenean?
Poza. Izan den polemikaren ondoren neretzat oso albiste ona izan da, nere anaiaren egun garrantzitsuenean berarekin eta familiarekin egon ahal izango naizelako.
-Korbataz ikusiko zaitugu?
Ez. Ez naiz korbatazalea. Agian nerean jantziko dut. Adibide gisa esango dizu anaia ez dela korbataz ezkonduko.
Ezkerra lantzen
AGIRRE
-Zer moduz materiala?
Ondo. Nireak jokatzekoak dira. Berarenen artean bat indarra duenetarikoa da.
-Zelan ikusten duzu partidua?
Zaila. Denok dakigu lau eta erdian zernolako pilotari da Aimar baina nik entrenamendu onak egin ditut, txispaz nabil eta fisikoki ondo nago.
-Aimarrek hiru aldiz lortu du lau eta erdiko txapela. Horietako bat 2004an, hain zuzen ere Balmasedan zu 22-7 mendean hartu zintuen urtean. Partidu hartaz gogoratzen zara?
Hasiera orekatua izan zen baina sakez min egin zidan, uste dut hamar bat sartu zizkidala, eta han bukatu zen partidua. Aurten ezkerrez hobeago nago eta entrenamenduetan horretan lan egin dut.
-Non izan daiteke Olaizolaren puntu ahula?
Bera oso ona da distantzian. Ni nere erritmoa jarri eta aukera denean bukatzea izango da gakoa.
-Zure jarraitzaile asko etorriko dira?
Bueno, ostiral gauean zailagoa da jendearentzat baina bai, Arratia, Durango edota Bilbotik batzu etorriko dira.
Olaizola II: 105,7-102,7 g.
Agirre: 105,1-104,3 g.