GREBA BATZORDEARI (Bilera 2020-10-20)
BAIKO KIROLA S.L.
I. Baiko Kirola S.L.-k, aurreko bileran adierazi zuen bezala, onartzen du pilotari profesionalen artean erreklamazioak daudela aldaketak gerta daitezen zuzendaritzarekiko elkarrizketan, kontratu-baldintza batzuen erregulazioan, entrenamendu-erregimenean edo barne-araudian, eta honen erantzukizuna da eskaera horiek kudeatzea, ahal duen neurrian.
Ildo horretan, idatziz azaldu du aurreko bileran urratsak emateko konpromisoa, baina azpimarratu du prozesu horri behar besteko lasaitasunez heldu behar zaiola pilotari guztiekin, eta, nahitaez, gaur egun diharduen pilota profesionalaren esparruan.
Gatazka hau gainditzen saiatzeaz gain, bere kezka esku-pilota profesionalaren etorkizunera eta etorkizun horrek enpresari eskaintzen dizkion aukeretara zuzenduta dago, kontuan hartuta, gainera, krisialdi ekonomikoak utziko dituen ondorioak.
II. Bestalde, grebaren erantzukizuna ez da enpresarena, grebaren sustatzaileari eta eskubide hori erabiltzea erabakitzen duenari baitagokio.
Horregatik, Greba-Batzordeari eskatzen zaio greba bertan behera utz dezala, beharrezko hausnarketarekin eta plantilla osoak erabakitzen duen bide ordezkaritzarekin dagokion negoziazioa egin dadin. Grebak eragiten duen presioarekin eta presarekin negoziatzeari uko egiten diogu.
Dagoeneko deituta dagoen eta laster egingo den hauteskunde-prozesuak, gainera, elkarrizketa hori prozesu horren ondoriozko ordezkaritzarekin egitea gomendatzen du.
III. Kontratua amaituta duten pilotarien kontratazio berrien prozesuei berrekiteari dagokionez, enpresak errepikatu du ez dagoela eskaera hori osorik onartzeko moduan, bai egungo egoera ekonomikoagatik, bai kirol-jardueraren eskaintza urriagoa legokeen testuinguruan horrek plantillaren gehiegizko dimentsioa ekarriko lukeelako.
Lehiaketa kolapsatuta dagoenez, EPELk erabaki berri du hura osatzen duten enpresei kontratazio horiek egiteko aukerak azter ditzatela eskatzea, EPELren lehiaketa ofizialari eragiten dion gatazka gainditzeko.
Hurrengo egunetan, EPELk zehaztuko du zer urrats egin beharko diren eta zer eragin izango duten enpresa bakoitzean.
IV. Enpresak, halaber, adierazten du, azken bileran planteatu zuen bezala, greba-batzordeak beharrezko baldintza gisa badu duela gutxi plantillako langile batzuekin lortutako soldata-murrizketari buruzko akordioak ondoriorik gabe uztea, ez duela aukerarik ikusten konponbide baterantz aurrera egiteko, eta, gainera, uste du grebari egotz dakiokeen edozein helburu legitimo gainditzen duen eskaera dela, fede txarrez lortu direla aurresuposatuta.
V. Greba Batzordeak planteatutako hitzarmen kolektiboari dagokionez, enpresak, gaur egungo testuinguruan, berriro dio pilotari profesionalen lan-harremanen esparruak itundutako kontratuen baldintzetan eta kirolari profesionalen lan-harreman berezia arautzen duen 1006/85 Errege Dekretuan oinarrituta jarraitu behar duela.
Eredu hori gainditzeak gure jardun-eremuko esku-pilota profesionalaren esparrua erabat berrikustea dakar.
Enpresaren ustez, halaber, ohiz kanpoko egoera batean egonik, osasun-krisi larriaren eta ondoriozko krisi ekonomiko globalaren eraginpean egonik (esku-pilota profesionala ez da krisi horretatik kanpo geratzen), ez da unea Greba Batzordeak bere hitzarmen kolektiboko plataforman eskatzen dituen kostuen gehikuntzak onartzeko (gutxi gorabehera urteko 150.000 euro).
VI. Hala ere, enpresak honako hauek eskaintzen ditu:
– Elkarrizketa-prozesu bat irekitzea entrenamenduen erregimena berrikusteko plantillak izendatutako ordezkariekin.
– Elkarrizketa-prozesu bat abiaraztea plantillak izendatutako ordezkariekin, barne-araudia berrikusteko, eta bertan behera uztea haren aplikazioa, aurrezdik ezarritako gehienezko aldi baterako. Barne-araubideko araudi berriari buruzko adostasunik ezean, oraingoa aplikatuko da berriro.
– Elkarrizketa-prozesu bat irekitzea plantillak izendatutako ordezkariekin lan-baldintzei buruzko gai batzuk aztertzeko.
VII. Enpresak Baiko Kirola S.L.-ri buruzko informazio ekonomikoa eskaintzen du. Informazio hori honako hau da:
– 2018-2019 ekitaldiari dagozkion urteko kontuak, Merkataritza Erregistroan gordailutuak. (1. dokumentua).
– Enpresak 2018-19 ekitaldian izandako diru-sarreren xehetasuna. (2. dokumentua)
– Sozietatearen 2019-20 ekitaldiko diru-sarrerei eta gastuei buruzko behin-behineko datuak. (2. dokumentua)
– 2020-21 ekitaldirako aurrekontu-aurreikuspena. (2. dokumentua).
– Covid-19ak enpresaren ustiapenean duen eraginari buruzko datu ekonomikoak. (3. dokumentua)
Erreklamatutako gardentasun ekonomikoa ezin da hutsaldu, ezta erabili ere, Baiko Kirola SL.-k, esku-pilota profesionalaren sustatzaile gisa garatutako jarduera gainditzen duten esparruak ezartzeko.
Bilbon 2020ko urriaren 20an