Mariezkurrena II.ak lau urteko kontratu berria sinatu du Baikorekin

2022-12-05

Mariezkurrena II.ak 2026ko abenduaren 31ra arte luzatuko den lau urteko kontratu berria sinatu du Baiko Pilotarekin. Berriozarreko atzelariak azaldu duenez, “bi aldeak oso azkar iritsi gara akordiora eta oso ilusionatuta nago etapa berri honekin”. 

Pilotari nafarrak nabarmendu du momentu oso onean harrapatu duela kontratu honek, izan ere azken hilabeteetan CaixaBank Mastersa eta Donostia Hiria, Aste Nagusia, Bizkaia eta San Fermin Torneoak irabazi ditu.

Gaur egun, Binakako Txapelketan murgilduta dago Mariezkurrena II.a Peña II.arekin batera, eta hasierako bi partidak irabazi ondoren pozik badago ere, Mariezkurrenak asmoa azaldu du “etorkizunera begira, ditudan gabeziak hobetzen joateko”. Horretarako aukera ostegun honetan bertan izango du atzelari nafarrak, Peña II.arekin batera iazko Binakako Txapelketako finalisten aurka jokatuko baitu Bergaran.