Miren Josune Ariztondo Kulturako foru diputatuak binakako Bizkaia Txapelketaren hirugarren edizioko nondik norakoak jakinarazi ditu. Txapelketa 2014ko urriaren 4an eta 11n jokatuko da. Martínez de Irujo, Xala, Merino II eta Berasaluze II izango dira txapelketan parte hartuko duten pilotari profesionaletako batzuk. Edizio honetako berritasuna, Bizkaiko bikote biren presentzia izango da.
Bilbon, 2014ko irailaren 26an.- Urriaren 4an eta 11n jokatuko da Bizkaia Txapelketa binakako txapelketaren hirugarren edizioa, Bizkaia Frontoian; txapelketa 5 1/2ko modalitatean jokatuko da.
Miren Josune Ariztondo Kulturako foru diputatuak eman du txapelketaren nondik norakoen berri; harekin batera, torneoan parte hartuko duten pilotariak izan dira.
Parte hartuko duten bikoteak
Honela osatuko dira Bizkaia Txapelketaren III. edizioan parte hartuko duten bikoteak: Mtz de Irujo-Rezusta, Xala-Merino II, Berasaluze II-Ibai Zabala eta Urrutikoetxea-Aretxabaleta
Lehiaketa-sistema eta egutegia
Txapelketaren sistema, finalerdietako kanporaketa eta finala izango dira. Urriaren 4an jokatuko dira finalerdi biak. Finalerdietako lehenengoan, Berasaluze II- Ibai Zabala eta Urrutikoetxea-Aretxabaleta bikote bizkaitarrek jokatuko dute. Bigarrenean, berriz, Mtz de Irujo-Rezusta eta Xala-Merino II bikoteak arituko dira. Lehenengo partida 17:45ean hasiko da.
Urriaren 11n jokatuko da finala, finalerdietako irabazleen artean. Partida horren aurretik atariko beste bat jokatuko da (Ezkurdia-Cecilio Artola-Apraizen aurka), 17:30ean.
Txapelketako sarituen zerrenda
2012an egin zen 1. edizioa Titin III-Barriola bikoteak irabazi zuen.
2013an egin zen 2. edizioan, irabazleak Olaizola II-Merino II izan ziren.
Sarrerak saldu eta erostea
Sarrerak salgai daude jada, Asegarce eta Aspe pilota-enpresetan, eta prezio hauetan erosi ahal izango dira: 15 ¤, 20 ¤ eta 30 ¤, egun bietarako. Argibide gehiago behar izanez gero, kontsultatu frontoiaren web orrian,www.bizkaiafrontoia.com eta pilota-enpresen web orrian.
Pilotaren oinarrizko modalitatea sustatzeko, doako 700 sarrera banatuko dira egun bakoitzean, eskola-ume diren pilotarien artean. Bizkaiko Euskal Pilota Federazioak banatuko ditu gonbidapenak.
5 1/2ko txapelketa berritzailearen hirugarren edizio honekin, Bizkaia Frontoiak pilotazaleei partida interesgarriak eskaintzen jarraitzen du; ikuskizun paregabeaz gozatu ahal izango dute, eraikin paregabean. Halaber, euskal pilota sustatzen jarraitzen du.