Larunbat honetan hasiko da Buruz Buruko 2023 Promozio Txapelketa

2023-04-11

Txapelketa asteburu honetan hasi eta maiatzaren 27an amaituko da Labriteko finalarekin

Agirre, Bakaikoa, Larrazabal, Zubizarreta III, Egiguren V.a, Exposito, Salaberria eta Zabala txapela irabazten saiatuko dira

Lehiaketa final-laurdenetako liga batekin hasiko dute, eta ondoren, finalerdiak eta finala jokatuko dituzte

Bilbo, 2023ko apirilaren 11

Buruz Buruko Promozio Txapelketa irabazten saiatuko diren pilotarien zerrenda eman dute ezagutzera gaur goizean Bizkaia Frontoian egindako aurkezpenean. Baiko Pilotako lau ordezkari eta Aspeko beste lau ahaleginduko dira maiatzaren 27ko finalean txapela janzten.

Asteburu honetan bertan jokatuko da final-laurdenetako ligako lehen jardunaldia. Bakaikoak eta Zubizarreta III.ak larunbatean estreinatuko dute txapelketa Labriten. Igandean Eibarren norgehiagoka bikoitza izango da. Alde batetik, Zabala-Salaberriak jaialdiari hasiera emango diote, eta bestetik, Egiguren V-Expositok Astelenako hitzordua itxiko dute. 
Astelehenean, Zumaian, Agirre-Larrazabalek Buruz Buruko Promozio Txapelketako lehen jardunaldiari amaiera emango diote.

Atsedena lehenengo jardunaldiaren ondoren eta finalerdiak baino lehen

Lehen jardunaldia jokatu ondoren, zortzi pilotariek astebeteko atsedena izango dute final-laurdenetako ligako hurrengo bi jardunaldiei aurre egin baino lehen. Behin lehen fase hau amaituta, sailkatutako lau pilotariek astebeteko atsedena hartuko dute berriro finalerdiak baino lehen.

Aurreneko jardunaldiko jaialdietarako sarrerak entradasfronton webgunean eskuratu ahal izango dira.