Guztia prest Zubizarreta III.aren debut egunerako

2020-09-28

Bigarren saiakeran bada ere, Iraitz Zubizarretak profesionalen artean debuta egingo du larunbat honetan arratsaldeko 17:30tan hasiko den herriko pilota jaialdian.
Ataungo aurrelari gazteak maiatzaren 9an debuta egitea aurreikusita zegoen baina Covid-19aren pandemiak estreinaldi hura zapuztu zuen.

Lau hilabete itxaron behar izan baditu ere, Zubizarreta III.ak era egokian egingo du salto profesionalen artera.
Ikusleak maskara jantzita joango dira nahitaez eta behar bezala erabiliko dute. Gainera, Esku Pilota Enpresen Ligak kirol eta osasun agintariekin adostutako protokoloak zehazten duen moduan, edukiera % 60ra murriztuko da. Hori dela eta, Ataungo Auzoeta pilotalekurako 378 sarrera baino ezin izan dira salgai jarri. Publikoak aldez aurretik egokitutako eserlekuak erabiliko ditu eta ezarritako tarteak errespetatuko ditu.

Herriko semearen debutak ikusmina sortu du eta sarrera guztiak agortu dira. Ondorioz, hainbat jende geratu da herriko pilotariaren debuta ezin ikusirik. Gogoratu beharra dago, pena handiz baina bizi dugun osasun krisiari aurre egiteko neurriak lehenetsiz hartu beharreko erabakia izan dela.

Larunbateko pilota jaialdia arratsaldeko 17:30ean hasiko da Ataungo Auzoeta pilotalekuan Arteaga II-Erasun eta Bakaikoa-Urretabizkaia II.aren arteko partidarekin. Honen ondoren egingo du debuta Zubizarreta III.ak Albisu herrikidea lagun duela, Bengoetxea VI-Arangurenen aurka.