FINALERAKO ARMAK PREST DAUDE

2019-03-22

Eguerdian Olaizola I.ak-Beloki eta Xala-Eulatek bat egin dute Gasteizko Ogeta pilotalekuan datorren igandean jokatuko duten Binakako txapelketako finalerako pilotak aukeratzeko.
Bikote biak konforme geratu dira otarrean aurkitutako pilotekin baina elkarren lotearekin kontra egin dute izan den prenstaurrekoan. Asegarcekoek aurkarien materiala motela dela esan duten bitartean Xalak eta Eulatek kontrarioen pilotak biziak direla erran dute.
Hona hemen lau protagonisten hitzak:

-Olaizola I.a
“Eurak konfidantzaz dabiltza. Huts gutxi egiten dute eta txapelketa ona gauzatu dute. Ziurrenik aurrean jokatzeari ekingo diote jokua nahastuz”.

-Beloki
“Pilota indartsuen bila joan gara pilotaleku honen luzeerak hala onartzen duelako eta atzean jokatzeko aukera ematen duelako. Xala gainditzen ahaleginduko gara”.

-Xala
“Lan asko egin beharko da partidu hau irabazteko. Asier pilotari indartsua da oso. Abiadura ematen dio pilotari eta txapagaineko zein dejadaz min handia egiten du”.

-Eulate
“Ea igandean binakako bigarren txapela janzten naizen. Gu aurrean jokatzen saiatuko gara jokua nahasi eta erritmo azkarra ipiniz”.

Olaizola I-Beloki:104,4-104-104,2 g.
Xala-Eulate: 102,3-102,8-103,4 g.
6 pilotak Punparenak dira.