FINALEAN EGON NAHIAN

2019-03-22

Olaizola II.a eta Patxi Ruizek erronka serioa daukate gaur gauez Atano III.a pilotalekuan Xala eta Paskualen aurrean. Datorren ostiralean, hilak 27, Donostia Hiria Torneoa – El Diario Vasco Saria-ko finalean egon nahi badute gaurko norgehiagoka irabazi behar dute nahitanahiez.

Aurrean Aspeko bikote sendoa dute eta nahiz eta Asegarcekoak irabazlegaitzat jo ezin izango dira makal ibili Inigo Paskualen jokua goi goian da eta. Abartzuzako atzelaria primerako uda egiten ari da eta benetazko koska izango zaie Asegarceko pilotariei.

Atzelarien partiduak ikusita oreka da nagusi elkarren kontra aritu diren sei partiduetatik hiruna baitaukate irabazita. Dena den Gasteziko Andra Mari Zuria torneoko finalean Paskualek jipoi ederra eman zion Patxiri 22 eta 7 emaitza latza gauzatuz. Lizarrakoa zulo handi hori estaltzen saiatuko da zalantzarik gabe.

Aurrelarien lehiak ikusterakoan Olaizola II.aren aldera doa estadistika hiru partiduetatik bi dauzka irabazita eta.