2023-11-22
- Izen aldatuta datorren Binakako Serie B Txapelketa ostiralean hasiko da eta martxoaren 23an amaituko da Labriteko finalarekin.
- 14 jardunaldi izango ditu sailkapen ligak, playoffetako bi partida jokatuko dituzte, eta hiru jardunaldi izango ditu finalerdietako ligak.
- Alberdi II-Morgaetxebarria, Larrazabal-Eskiroz, Zubizarreta III-Ugartemendia, Agirre-Iztueta, Egiguren V-Eskuza, Salaberria-Arbizu, Exposito-Gaskue, eta De la Fuente-Bikuña txapela irabazten saiatuko dira.
Baikok eta Aspek gaur goizean aurkeztu dituzte 2024ko Binakako Serie B Txapelketa irabazten saiatuko diren zortzi bikoteak. Baikoko lau bikote eta Aspeko beste lau saiatuko dira txapela janzten martxoaren 23an Labriten jokatuko den finalean.
Baiko eta Asperen bikoteak
Baiko Pilotak bere koadroko lau bikote hauek aukeratu ditu txapela lortzeko asmoz: Alberdi II-Morgaetxebarria, Larrazabal-Eskiroz, Zubizarreta III-Ugartemendia eta Agirre-Iztueta.
ASPE Pelotak aukeratu dituenak hauek izan dira: Egiguren V-Eskuza, Salaberria-Arbizu, Exposito-Gaskue, eta De la Fuente-Bikuña.
Ostiralean hasita
Ostiral honetan, Azkoitian emango diote hasiera lehiaketari Egiguren V-Eskuzak eta De la Fuente-Bikuñak. Larunbatean, Agirre-Iztuetak eta Alberdi II-Morgaetxebarriak jokatuko dute elkarren aurka Aizarnazabalen. Igandean Zubizarreta III eta Ugartemendia, eta Senar, Larrazabal ordezkatuz, eta Eskiroz izango dira aurrez aurre Seguran. Eta azaroaren 30ean, Eibarren, Salaberria-Arbizu eta Exposito-Gaskue saiatuko dira aurreneko puntua eskuratzen.
Txapelketaren egitura
Etzi, ostiralean, Azkoitian hasi eta martxora bitartean luzatuko da Eskuz Binakako Serie B Txapelketa. Zazpi jardunaldiko bi itzuli, orotara hamalau jardunaldi jokatuko dituzte pilotariek sailkapen ligan. Bi bikote onenak zuzenean sailkatuko dira finalerdietako ligara eta hirugarren eta seigarren postuen artean sailkatuek playoffak jokatu beharko dituzte aurrera egin ahal izateko. Finalerdietako ligak hiru jardunaldi izango ditu eta final handia Labriten izango da martxoaren 23an.
Sarrerak
Aurreneko jardunaldietako jaialdietarako sarrerak entradasfronton webgunean eskuratu daitezke jadanik.