• Baiko Pilotak aurkeztu dituen lau bikoteak: Zubizarreta III-Uriondo, Arteaga II-Elizegi, Alberdi-Salaverri II eta Larrazabal-Eskiroz
• Aspe ordezkatuko duten lau bikoteak: Elordi-Garmendia, Salaberria-O.Etxebarria, Egiguren V-Ruiz eta Zabala-Erostarbe
Bilbo, 2020ko abenduaren 30a
Eskuz Binakako Promozio mailako Txapelketan parte hartuko duten 8 bikoteak aurkeztu dituzte gaur goizean Bizkaia Frontoian. Enpresa bakoitzeko zortzi pilotari. Baiko Pilotak bere koadroko zortzi pilotari hauek aukeratu ditu txapela lortzeko asmoarekin: Zubizarreta III-Uriondo, Arteaga II-Elizegi, Alberdi-Salaverri II eta Larrazabal-Eskiroz. Helburu berarekin, ASPE Pelotak Elordi-Garmendia, Salaberria-O.Etxebarria, Egiguren V-Ruiz eta Zabala-Erostarbe aurkeztu ditu.
Ostiral honetan Eibarren hasi eta maiatzera bitartean luzatuko da Eskuz Binakako Promozio mailako 2021 Txapelketa. Jai egunik egon ezik, lau pilota jaialdi izango dira astebururo ostiraletik astelehenera bitartean.
Zazpi jardunaldiko bi itzuli, orotara hamalau jardunaldi jokatuko dituzte pilotariek sailkapen ligaxkan. Bi bikote onenak zuzenean sailkatuko dira finalerdietako ligaxkara eta hirugarren eta seigarren postuen artean sailkatuek playoffak jokatu beharko dituzte aurrera egin ahal izateko. Final handia maiatzaren 8an izango da.