ESKUZ BANAKAKO TXAPELKETA FRONTON SAIOAN

2019/03/22

Pilotako txapelketarik garrantzitsuena Fronton programara heldu da eta lehen hitzordua larunbat honetan izango da Patxi Ruizek eta Beginok elkarren aurka jokatuko duten partiduaz. Labriten gauzatuko den Eskuz Banakako txapelketako kanporaketa honetatik ateratzen den irabazlea finalaurdenetako ligaxkako B taldean sartuko da Olaizola II.a, Gonzalez eta Xalaren lehiatzeko.

Buruz buruko txapelketan egindako bi ibilbideak alderatuz alde erabatekoa da.
Lizarrako atzelaria 1999an hasi zen parte hartzen eta 2003ko edizioan txapeldun izendatu zuen bere burua. 10 urte horietan 27 partidu jokatu ditu, 17 garaipen patrikaratuz (bat Olaizola I.ak min hartuta dela medio) eta 10 porrot hartuz.

Auzako pilotariak aldiz, bi ediziotan besterik ez du parte izan, hau da, 2008 eta 2009an, eta osotara lau neurketa jokatu ditu, horietatik 2 irabazita ditu eta beste bi galduta.