Ostiralean, Medranon, Artola-Rezustak bereari eutsi zioten Elezkano II-Aretxabaleta bikoteari irabazita. Hasieran paretsu ibiltea lortu bazuten ere, gipuzkoarrek gora egin zuten markagailuak aurrera egin ahala. Artola-Rezustak 12-22 irabazi zuten eta horrela sailkapenaren goialdean sendotu ziren bost partidatan lau puntu eskuratuta.
Labriteko gaueko jaialdiak Olaizola II-Zabaleta eta Altuna III-Imaz jarri zituen aurrez aurre. Bikote gipuzkoarra aurretik joan zen ia partida osoan zehar, baina nafarren bi oldarraldik aldatu zituzten norgehiagokaren nondik norakoak. Lehen zartadak markagailua hamabi tantora berdintzeko balio izan zien (06-12). Eta bigarrenean, Olaizola II-Zabaletak aurka zuten 17-19ko markagailua irauli zuten partida amaierako 22-19ra iristeko. Bikote nafarrak hirugarren puntua jarraian lortu du lehenengo bi jardunaldietako porroten ostean.
Igandean, bi partida jokatu ziren. Zarautzen, Urrutikoetxea-Irribarriak Jaka-Albisuren aurkako neurketako lehenengo tantoa egin bazuten ere, handik aurrera atzetik joan ziren partida guztian, 09-22ra iritsi arte. Garaipen honekin Jaka-Albisuk hirugarren puntua eskuratu zuten eta berdinduta daude sailkapenean Olaizola II-Zabaleta, Altuna-Imaz eta Ezkurdia-Arangurenekin.
Arbizun, Ezkurdia-Arangurenek, Artola-Rezustarekin batera sailkapenaren goiko postuetan jarraitzeko aukera zuten atzo baina horretarako Bengoetxea VI-Martija mendean hartu behar zituzten. Arbizuarren animoak alde zituztela, Ezkurdia-Aranguren aurretik iritsi ziren lehen atsedenaldira (11-12). Baina hortik aurrera gauzak aldatzen hasi ziren. Bengoetxea VI.aren sakeek, partidaren lehen zatian ezkerretik ateratzen hasi zen eta gero eskuinera aldatu zen, min egin zieten urdinei eta pixkanaka Martijarekin batera lekua egin zuen. Lehen atsedenalditik partida amaierara arteko aldeak (11-04) argi erakusten du Bengoetxea VI-Martija gehiago izan zirela eta Ezkurdia-Arangurenek, berriz, behera egin zutela
Garaipen honek Bengoetxea VI-Martija sailkapenaren gorenean jarri ditu Artola-Rezustarekin berdinduta bi bikoteek jokoan zeuden bost puntuetatik lau irabazi ondoren. Balantzaren beste aldean, Urrutikoetxea-Irribarria eta Elezkano II-Aretxabaleta daude partidarik irabazi gabe. Zuloa gero eta handiagoa da.