CaixaBank Masterseko aurreneko finalerdia jokatuko dute gaur Adarraga pilotalekuan

2020-09-21

Sailkapen ligaxka larunbatean itxi ondoren, gaur arratsaldean jokatuko dute lehenengo finalerdia Logroñoko Adarraga pilotalekuan.
Orain artean erregularrenak izan diren Artola-Rezustak, gorabeheratsuago ibili diren Bengoetxea VI-Martija izango dituzte aurrez aurre arratsaldeko 19:15etik aurrera.

Ligaxkan elkarren aurka jokatu dituzten bi partidetan, Artola eta Rezusta izan dira nagusi. Hirugarren jardunaldian Tolosan elkartu ziren eta norgehiagoka hartan Peña II.ak hartu zuen min hartuta zegoen Bengoetxea VI.aren tokia. Gipuzkoarrek 22-10 irabazi zuten.
Bigarren itzuliko partida Sorian jokatu zuten eta orduan ere Artola-Rezustak lortu zuten garaipena 16-22 nagusituz.

Logroñoko pilota jaialdia 19:15ean hasiko da. Lehenengo partidan Dario-Ruiz eta Zabala- Urretabizkaia II.ak neurtuko dituzte elkarren indarrak. Ondoren, CaixaBank Masterseko finalerdia jokatuko dute. Eta jaialdiari amaiera emateko Egiguren V-Tolosa eta Salaberria-O.Etxebarria kantxaratuko dira.