BENGOETXEA VI.A ETA PATXI RUIZ MTZ. DE IRUJO ETA MERINO II.AREN GAINETIK PASA DIRA KOLORE GABEKO PARTIDUAN

2019-03-22

Bengoetxea VI.ak eta Patxi Ruizek osatzen duten Asegarceko bikoteak Euskadi Goza ezazu Binakako Txapelketako final laurdenetako ligako lehen puntua lortu dute Eibarko Astelena pilotalekuan Mtz. de Irujo eta Merino II.aren aurka jokatu duten partiduan 4-22 irabazi eta gero.
Urdinak jaun eta jabe izan dira markadorean eta Bengoetxea VI.ak tanto betekada ederra hartu du 11 tanto lortuz -4 sakez eta 7 jokaldiz-.
Patxi Ruiz ondo aritu da Mtz. de Irujori airea kenduz eta kantxa osoan zehar leitzarraren bizkarra zainduz.

Partidu ona baina punturik gabe

Nahiz eta partidu on bat jokatu, Berasaluze VIII.ak eta Apraizek Euskadi Goza ezazu Binakako Txapelketako final laurdenetako ligako lehen jardunaldiko neurketan 22-18 amore eman behar izan dute Titin II.a eta Pascualen aurrean eta horren ondorioz puntu bat ihes egin zaie.

Asegarceko bikotea partiduaren denbora gehienean aurretik joan da eta nabarmentzekoa da Berrizko pilotariak egin duen neurketa, izan ere, Berasaluze VIII.ak 12 tanto loru ditu.
Apraizek ere norgehiagoka ona jokatu du baina azken txanpan fisikoki behera joan da eta hori aprobetxatuz gorriek gorakada egin dute 14-17etatik 18-22ra lortuz.