Baikok eta Lasok 2027ra arte berritu eta luzatu dute akordioa

2022-06-27

Jose Ramon Garaik, Baiko Pilotako zuzendariak, eta Unai Lasok, Baiko Pilotako pilotariak, gaur goizean prentsaurrekoan iragarri dutenez, bi aldeak 2027ra arte batuko dituen akordioa berritu eta luzetu dute.

Jose Ramon Garaik eta Unai Lasok azpimarratu dute akordioa azkarra izan dela, bi aldeek akordioa sinatzeko borondatea argi zutelako.

Baiko Pilotako zuzendariak azpimarratu du azken denboraldi honetan Lasok jauzi handia egin duela “bai bere jokoan bai bere errendimenduan”, eta gaineratu duenez, “ziur gaude oraindik ez duela goia jo eta datozen urteetan hobetuko dituela”. Horrekin batera nabarmendu du Laso erreferentziazko pilotari bihurtzen dela Baikon, eta enpresak “itxaropen handiak” dituela horretan jarrita.

Bestalde, Unai Lasok eskerrak eman dizkio Baiko Pilotari, “bost urte hauek aurrera eramateko nigan jarri duen konfiantzagatik”. Eta ilusio handia agertu du, “orain bost urte baititut aurretik pilotaz gozatzen jarraitzeko, eta hori da egitea gehien gustatzen zaidana”.