AURKARI TXIKIRIK EZ DAGO

2019-03-22

Olaizola II.ak eta Beginok Euskadi Goza ezazu Binakako txapelketako hirugarren puntoa lortu dute gaur Astelena pilotalekuan Aritz Lasa-Merino II.a 22-15 menderatuta.

Asegarceko bikoteak egin duen lana ez da inolaz ere makala izan eta 73 minutu iraundu duen partidan izerdi galanta bota behar izan dute bi pilotariek neurketa hasi baino lehen bikote eskuragarritzat eman dutena garaitzeko. Gogortasun hori adierazten dutenak 70 pilotakada baino gehiago eman diren tantoak dira.

Beginoren hasiera ez da ona izan eta zati horretan gertatu dira berak egin dituen huts gehienak, baina 14-11 etatik aurrera bere joaren norabide eta boterea nabarmen hobetu dira eta horren seinalea 16-11 tantoan lortu duen errebotea izan da. Hala eta guztiz ere Merino II.a gazteak oso partidu ona egin du eta Auzako atzelariari aurre egiteaz gain pilota ederki astindu du.

Aurrekaldean Olaizola II.ak eta Aritz Lasak pilotazaleek arras gozatu duten lehia ederra eskeini dute. Olaizola II.ak ez du huts bat ere egin eta 6 tanto lortu ditu. Urretxuarraren kontuan 8 punto eta 7 huts ezarri behar dira.