Asteburuko emaitzek hautsi egin dute sailkapena

2019-03-22

Berria. Gutxi falta da Binakako Txapelketako ligaxka azken txanpan sartzeko. Hondarreko partidak izan ohi dira emozio gehien dutenak, baina aurten arriskua dago ordurako guztia erabakita egoteko. Izan ere, asteburuko emaitzak ikusi eta gero, hautsi egin da dagoeneko sailkapena.

Artola eta Mariezkurrena II.a laugarren postuan sendotu dira, Bengoetxea VI.a eta Imaz mendean hartu ostean. Hala, sei jardunaldi falta direla, jada bi garaipenen aldea dago bi bikoteen artean; baita Altuna III.ak eta Martijak osatzen duten bikotearen artean ere.

Ezuste handirik ezean, hiru bikote horien artean irtengo da finalerdietako ligaxkarako sailkatuko den azken bikotea. Izan ere, Ezkurdia-Ladis Galarza eta Urrutikoetxea-Aretxabaleta ia aukerarik gabe geratu dira; bi partida irabazi dituzte.

Hain zuzen, bi bikote horiek jokatuko dute datorren jardunaldiko lehen partida, ostiralean, Mungian. Baina ikusmin handiena larunbatean egongo da. Izan ere, Artolak eta Mariezkurrenak huts egitea behar dute atzekoek finalerdietan egon ahal izateko. Lehen postuan dauden Elezkano II.aren eta Rezustaren kontra jokatuko dute, Iruñeko Labrit pilotalekuan.

Gara.Oreka hausteko arriskua