2024-11-27
- Binakako Serie B Txapelketa ostiralean hasiko da eta martxoaren 22an amaituko da Labriteko finalarekin.
- 14 jardunaldi izango ditu sailkapen ligak, playoffetako bi partida jokatuko dituzte, eta hiru jardunaldi izango ditu finalerdietako ligak.
- Agirre-Ugartemendia, Larrazabal-Salaverri II, Senar-Eskiroz, Zubizarreta III-Morgaetxebarria, Egiguren V-Bikuña, Salaberria-Gaskue, Zabala-Eskuza, eta Dario-Gabirondo txapela irabazten saiatuko dira.
Baikok eta Aspek gaur goizean aurkeztu dituzte 2025eko Binakako Serie B Txapelketa irabazten saiatuko diren zortzi bikoteak. Baikoko lau bikote eta Aspeko beste lau saiatuko dira txapela janzten martxoaren 22an Labriten jokatuko den finalean.
Baiko eta Asperen bikoteak
Baiko Pilotak bere koadroko lau bikote hauek aukeratu ditu txapela lortzeko asmoz: Agirre-Ugartemendia, Larrazabal-Salaverri II, Senar-Eskiroz, Zubizarreta III-Morgaetxebarria.
ASPE Pelotak aukeratu dituenak hauek izan dira: Egiguren V-Bikuña, Salaberria-Gaskue, Zabala-Eskuza, eta Dario-Gabirondo.
Ostiralean hasita
Ostiral honetan, Beasainen emango diote hasiera lehiaketari Zubizarreta III-Morgaetxebarriak eta Senar-Eskirozek. Larunbatean, Lizarran, Alberdi II.ak -Agirreren ordez- eta Ugartemendiak, Bakaikoa -Larrazabalen ordez- eta Salaverri II.aren aurka jokatuko dute. Egun berean, larunbatean, Eibarren, Egiguren V-Bikuña eta Salaberria-Gaskue izango dira aurrez aurre. Eta igandean, Basaurin, Dario-Gabirondok eta Zabala-Eskuzak itxiko dute lehenengo jardunaldia.
Txapelketaren egitura
Etzi, ostiralean, Beasainen hasi eta martxora bitartean luzatuko da Eskuz Binakako Serie B Txapelketa. Zazpi jardunaldiko bi itzuli, orotara hamalau jardunaldi jokatuko dituzte pilotariek sailkapen ligan. Bi bikote onenak zuzenean sailkatuko dira finalerdietako ligara eta hirugarren eta seigarren postuen artean sailkatuek playoffak jokatu beharko dituzte aurrera egin ahal izateko. Finalerdietako ligak hiru jardunaldi izango ditu eta final handia Labriten izango da martxoaren 22an.
Sarrerak
Aurreneko jardunaldietako jaialdietarako sarrerak entradasfronton webgunean eskuratu daitezke jadanik.